هاتوچۆی گەرمیان ڕایگەیاندووە، لە ڕوداوێكی هاتوچۆدا لەڕێگای سەرەكی كەلار-سلێمانی هاوڵاتییەك گیانی لەدەستداوە و كەسێكی دیكەش بریندار بووە.
ئەمڕۆ چوارشەممە 17ی شوبات، هاتوچۆی گەرمیان لە ڕاگەیەندراوێكدا ڕایگەیاندووە، “لە نزیک گوندی بەردەسوری کۆن بەهۆی ڕوداوێکی هاتوچۆوە کەسێک گیانی لەدەستدا و کەسێکی تریش برینداربوو”.
سەبارەت بە وردەكاریی ڕوداوەكە هاتوچۆی گەرمیان ئاشكرایكردووە، “بەیانیی ئەمڕۆ کاتژمێر 7:15 خولەک ئۆتۆمبێلێکی جۆری کیا دووتەنی بارهەڵگر، بە ئاڕاستەی سلێمانی ڕۆشتووە لەنزیک گوندی بەردەسوری کۆن لە ‘ملەی بەردەسور’ دوای ئەوەی کۆنترۆڵی لەدەستداوە خۆی کێشاوە بەستوونێکی کارەبادا و وەرگەڕاوە”.
ئەوەش خراوەتەڕوو، “بەوهۆیەوە شۆفێری ئۆتۆمبێلەکە گیانی لەدەستداوە و سەرنشینێکیش کە کوڕی شۆفێرەکەیە برینداربووە”.
هاتوچۆی گەرمیان دەڵێت، “پاش گەیاندنی بریندارەکە بە نەخۆشخانەی فریاکەوتنی شەهید هەژار لە کەلار، لێکۆڵینەوە لە ڕوداوەکە دەستی پێکردووە”.
