دوو ڕۆژە بەهای نەوتی خاوی برێنت لە سەروی 63 دۆلارەوە جێگیرە، هۆكارەكەی بۆ داخستنی بەشێك لە پاڵاوگەكانی نەوتی تێكساس دەگەڕێندرێتەوە.
ئەمرۆ سێشەممە 16ی شوبات، لەكاتی بڵاوكردنەوەی ئەم هەواڵە، بەهای یەك بەرمیل نەوتی خاوی برێنت 63 دۆلار و 52 سەنتە.
هەروەها نرخی یەك بەرمیل نەوتی خاوی ڕۆژئاوای تێكساس 60 دۆلار و 20 سەنتە.
ئاژانسی ڕۆیتەرز هۆكاری بە بەرزی مانەوەی نرخی نەوتی خاو دەگەڕێنێتەوە بۆ داخرانی بەشێكی پاڵاوگەكانی نەوتی ویلایەتی تێكساس بەهۆی بەفرەوە، كە بە گەورەترین بەرهەمێنەری نەوت ناوی بردووە.
ئەو ئاژانسە هۆكارێكی دیكەی بەرزبوونەوەی نرخی نەوتی گەڕاندووەتەوە بۆ ئەوەی، چەكدارانی حوسی لە یەمەن ڕایانگەیاندووە، “بۆردوومانی سعودیەیان كردووە”، ئەوەش ترسی دروستكردووە كە سعودیە كە گەورەترین هەناردەكاری نەوتی ڕێكخراوی ئۆپیكە كێشەی بۆ دروست بێت.
