عەلی ئەسخەر حاجی، یاریدەدەری وەزیری دەرەوەی ئێران ئەمڕۆ یەکشەممە 14ی شوبات ڕایگەیاند کە وەڵامی توندی ئیسرائیل دەدەنەوە ئەگەر هێڵە سورەکان ببەزێنن و دەڵێت، بوونی ئێران لە سوریا ڕاوێژکارییە و تاکاتێک سوریا دەیەوێت لەوێ دەمێنینەوە.
لە چاوپێکەوتنێکیدا لەگەڵ ئاژانسی سپۆتنیک عەلی ئەسخەر سەبارەت بە هێرشەکانی ئیسرائیل ڕایگەیاند، “سروشتی لایەنی جولەکە لە بنەڕەتەوە و بەبەردەوامی سروشتێکی دوژمنکاری بووە لە ناوچەکە ، وەک چۆن مامەڵەشیان لەگەڵ گەلی فەلەستین و دراوسێکانیان هاوشێوەیە”.
ڕاشیگەیاند، “لەکاتێکدا کە سوریا شەڕی دژی تیرۆری دەکرد بەڵام ئیسرائیل هاوکاریی تیرۆریستانی دەکرد”.
جەختیشیکردەوە کە بوونیان لە ئێران بۆ ڕوبەڕوبوونەوەی داعش و لایەنە تیرۆریستییەکانە، بەڵام ئەگەر لایەنی جولەکە بیەوێت هێڵە سورەکان ببەزێنێت بە توندی وەڵامی دەدەینەوە بەبێ ئەوەی چاوپۆشی بکەین.
لەبارەی دەرچوونیان لە سوریا ئەو بەرپرسە ئێرانییە وتی، “هیچ پەیامێکمان پێنەگەیشتووە بۆ کشانەوەمان لە سوریا و بوونی ئێران لەو وڵاتە لەسەر داوای حکومەتی سوریایە و بەمەبەستیی ڕاوێژکاریی سەربازی لەوێین، تاوەکو کاتێکیش گەل و حکومەتی سوریا بیانەوێت دەمێنینەوە”.
