بڕیارە پێش نیوەڕۆی ئەمڕۆ جڤاتی نیشتیمانی بزوتنەوەی گۆڕان هەڵبژاردن بۆ پڕكردنەوەی سێ پۆستی خانەی ڕاپەڕاندنی بزوتنەوەكە ئەنجامبدات.
ژووری هەڵبژاردنی بزوتنەوەی گۆڕان لە ڕاگەیەنراوێكدا بڵاویكردەوە، دوای کۆتایهاتنی وادەی خۆکاندیدکردن كاتژمێر 11:00ی پێش نیوەڕۆی ئەمڕۆ شەممە 13ی شوبات پرۆسەی هەڵبژاردنی تەواوكاری خولی دووەمی خانەی ڕاپەڕاندن ئەنجامدەدرێت و ئەندامانی جڤاتی نیشتمانی دەنگدەدەن بۆ هەڵبژاردنەوەی سێ کەسی دیکە بۆ ئەو پۆستانە.
ئاشكراشیكرد، بۆ هەر سێ پۆستەکە ڕکابەری هەیە، بۆ هەریەکە لە پۆستەکان دوو هەڵسوڕاو خۆیان کاندیدکردووە و کاندیدی ئافرەتیش لەناو ڕکابەرییەکەدایە.
پۆستەكان بریتین لە (سكرتێری جڤاتی نیشتیمانی، سكرتێری كاروباری فراكسیۆنەكان و سكرتێری كاروباری باژێرەكان) كە پێشتر لەلایەن عەدنان عوسمان، جەلال جەوهەر و شەماڵ عەبدولوەفا-وە بەڕێوەدەبران و دەستیان لێی كێشاوەتەوە.
دلێر عەبدولخالق، ڕێکخەری ژوری ڕۆژنامەوانی بزوتنەوەی گۆڕان بە تۆڕی میدیایی ئێستای وت، پڕۆسەكە لەلایەن ژووری هەڵبژاردنەوە ئەنجامدەدرێت و ئەوان لایەنی تایبەتمەندن.
ئەوەشی وت، “ئەمڕۆ كۆبوونەوەی جڤات بەڕێوەناچێت، بەڵكو تەنها پڕۆسەی هەڵبژاردنی تەواوكاری خولی دووەمی خانەی ڕاپەڕاندن ئەنجامدەدرێت و دواتر ئەنجامەكەی ئاشكرادەكرێت”.
