كۆمپانیای تویتەر جەختدەكاتەوە كە دەركردنی دۆناڵد ترەمپ لەو تۆڕە بۆ هەمیشەیە و پاشگەزبوونەوە لێی مەحاڵە، تەنانەت ئەگەر بشبێتەوە بە سەرۆك ئەوا ناهێڵن تویتەر بەكاربهێنێت.
نێد سیگال، بەڕێوبەری دارایی كۆمپانیای تویتەر لە دیدارێكیدا لەگەڵ كەناڵی سی ئێن بی سی و لە وەڵامی ئەو پرسیارەدا كە ئاخۆ كۆمپانیاكە چیتر ڕێگە بە دۆناڵد ترەمپ سەرۆكی پێشووی ئەمریكی دەدات تویتەر بەكاربهێنێت؟ ناوبراو ڕایگەیاند، “قەدەغەكردنی ترەمپ لە تویتەر و داخستنی هەژمارەكەی هەمیشەییە نەك كاتی.”
وتیشی، “ئەگەر ترەمپ جارێكی تر هەڵبژاردن بباتەوە و ببێتەوە بە سەرۆكی ئەمریكا، ئەوا ڕێگەی پێنادرێت بێتەوە تویتەر، سیاسەتەكانی كۆمپانیاكەمان جەختدەكاتەوە لە داخستنی هەژماری ئەوانەی هانی توندوتیژی دەدەن و هەرگیز ڕێگە بە گەڕانەوەیان نادەن.”
دوای بەڕێوەچوونی هەڵبژاردنی سەرۆكایەتیی ئەمریكا لە كۆتایی ساڵی ڕابردوودا، كۆمپانیای تویتەر هەژمارەكەی دۆناڵد ترەمپ سەرۆكی ئەمریكای داخست بە پاساوی ئەوەی وتە و تویتەكانی هاندەری توندوتیژی بوون، ئەوكات كۆمپانیاكە ڕایگەیاندبوو كە داخستنەكە بەشێوەیەكی كاتییە.
بەڵام دواتر و بەهۆی هەڵكوتانەسەر باڵەخانەی كۆنگرێس لەلایەن لایەنگرانی ترەمپ و دروستبوونی توندوتیژییەوە، كۆمپانیاكە ئاشكرایكرد كە هەژمارەكەی ترەمپ-ی لە تویتەر بەیەكجاری داخستووە.
