دوو چەكداری داعش لە كەركوك كوژران و ئەندامێكیشیان دەستگیركرا.
شانەی ڕاگەیاندنی ئەمنی ئەمشەو چوارشەممە 10ی شوبات ڕاگەیەندراوێكی بڵاوكردەوە و ئاشكرایكرد، “بە هاوكاری و زانیاریی فەرماندەیی ئۆپەراسیۆنە هاوبەشەكان، فڕۆكەكانی هاوپەیمانان داعشەكانیان لە كەركوك بۆردومانكردووە.”
ڕوونیشیكردەوە، بۆردومانكردنەكە لە زنجیرە چیای حەمرین بووە و بووەتەهۆی كوژرانی دوو ئەندامی داعش.
هەر ئەمڕۆ تیرۆریستێكی كە كاربەدەستێكی داعشە، لە كەركوك دەستگیركرا. دەزگای هەواڵگریی عێراق لەو بارەیەوە ئاشكرایكرد، دەستگیركراوەكە لە موسڵ هەڵهاتووە و خۆی لە هێزە ئەمنییەكان شاردووەتەوە، بەڵام لە كەركوك دەستگیركرا.
دەزگای هەواڵگری لە ڕاگەیەندراوێكدا ڕوونیشیكردەوە، ئەو داعشە خەڵكی تەلەعفەرە و بەپێی مادەی 4ی تیرۆر بڕیاری دەستگیركردنی بۆدەركراوە، ئەمڕۆ چوارشەممە لەناوچەی كەی وەن لە شاری كەركوك لەلایەن تیمەكانی هەواڵگرییەوە دەستگیركراوە.
