سەرۆکی ئەنجومەنی دادوەریی ئێران ئاشکرایکرد، ئامادەن لەگەڵ عێراق زیندانییەکانیان ئاڵوگۆڕ بکەن و لەوبارەیەشەوە گفتوگۆیان کردووە.
ئیبراهیم ڕەئیسی، سەرۆکی ئەنجومەنی دادوەریی ئێران لە سەردانیدا بۆ عێراق ڕایگەیاند، ” ئەگەر بتوانین زیندانییەکان بگوازینەوە بۆ ئێران هەم ئەرکی دەسەڵاتی دادی ئێران کەم دەبێتەوە و هەم نیگەرانیی بنەماڵەی زیندانییەکان کەمتر دەبێت”.
ڕەئیسی پێشنیازی کردووە کە ژمارەیەکی کەمی ئێرانییەکان کە بە هۆی چوونی نایاسایی و هەروەها گواستنەوەی مادەی هۆشبەر و بەکارهێنانی لە عێراق دەستگیر کراون، ببەخشرێن و بگەڕێندرێنەوە ئێران.
سەرۆکی ئەنجومەنی دادوەریی ئێران لە عێراقەوە ڕاشیگەیاند، ژمارەیەک زیندانی عێراقی لە ئێران دەستگیرکراون ئامادەن دوای تەواوکردنی ڕێکارە یاساییەکان بیانگەڕێننەوە بۆ وڵاتی خۆیان.
سێ ڕۆژ پێش ئێستا میدیا ئێرانییەکان ئاشکرایان کرد، سەردانەکەی ئیبراهیم ڕەئیسی بۆ عێراق بە داواکاری فائیق زیندان، سەرۆکی ئەنجومەنی باڵای دادوەری عێراقە و بڕیارە چەند لێکتێگەیشتنێک لە نێوان هەردوو وڵاتدا واژوو بکرێت.
