هەولێر و بەغداد سیستمی سەرپێچییەکانی هاتوچۆیان یەکخست و لەمەودوا لە هەر کوێی عێراق و هەرێمی کوردستان سەرپێچی بکەیت، سزاکەی بەپێی تابلۆی ئۆتۆمبێلەکەت بۆت دەگەڕێتەوە.
عودەی سەمیر، بەڕێوەبەری گشتیی هاتوچۆی عێراق ڕایگەیاند، لەگەڵ هەرێمی کوردستان سەبارەت سەپاندنی سزای تیژڕەوی و تاریککردنی جامی ئۆتۆمبێل گەیشتوونەتە ڕێککەوتن بۆ دڵنیابوون لە جێبەجێکردنی یاساکانی هاتوچۆ.
وتیشی، هەماهەنگیی بەردەوام لەنێوان بەڕێوەبەرایەتیی گشتیی هاتوچۆی عێراق لەگەڵ هاوتاکەی لە هەرێمی کوردستان هەبووە، یەکخستنی ڕێکارەکانیش مافێکی یاساییە و لە یاسای هاتوچۆدا زامن کراوە، هەروەها هەنگاوێکی نوێ نییە و ساڵانێکە لە تەواوی وڵاتانی جیهان کاری پێدەکرێت.
هەماهەنگییەکە بەجۆرێکە، ئەگەر بە تابلۆی پارێزگاکانی عێراق لە هەرێمی کوردستان سەرپێچی بکەیت غەرامەکەت دەچێتەوە بەغداد، و ئەگەر بە تابلۆی هەرێمیش لە عێراق سەرپێچی بکەیت غەرامەکەت بۆ دەگەڕێتەوە بۆ بەڕێوەبەرایەتیی هاتوچۆی پارێزگاکەت
