پۆلیسی هەولێر ڕایدەگەیەنێت، بەهۆی ئاژاوەنانەوە و دەستدرێژیکردنە سەر موڵک و ماڵی گشتی، خورشید هەرکی و حەیدەری برایمان دەستگیرکرد.
بەڕێوەبەرایەتیی پۆلیسی پارێزگای هەولێر لە ڕوونکردنەوەیەکدا بڵاویکردەوە، “ئەمڕۆ لە 5ـی 7ـی 2026 لەسەر فەرمانی دادگا، هەردوو تاوانبار خورشید لەتیف و حەیدەر لەتیف دەستگیرکران و لە ماوەی داهاتوودا، لەسەر تاوانەکانیان دادگاییدەکرێن”.
ئاماژەی بەوەشکرد، دەستگیرکردنەکە دوای ئەوە بووە، “لە ماوەی ڕابردوودا هەردوو ناوبراو بوونە هۆکاری ئاژاوەنانەوە و کێشە، دەستدرێژیکردنە سەر موڵک و ماڵی هاوڵاتییان و موڵکی گشتی، شەهیدکردنی پێشمەرگەیەک و هاوڵاتییەک، سووتاندنی کەلوپەلی سەربازیی هێزەکانی پێشمەرگە، هاندانی خەڵک دژی یاسا و سەقامگیریی گشتی، ڕێگریکردن لە پڕۆژەکانی حکومی، هەڕەشەکردن بە تێکدانی ژێرخانی ئابوری لە شوێنی جیاجیای قەزای خەبات، هەروەها دوای هەبوونی سکاڵا لە دژیان لەلایەن هاوڵاتییانەوە”.
