دەزگای لوتكە ڕایدەگەیەنێت، هێزە ئەمنییەكانی دانیمارك كۆچبەرێكی عێراقییان بە تۆمەتی كوشتنی كۆچبەرێكی كوردی وڵاتەكە دەستگیركردووە.
دەزگای لوتكە بۆ كاروباری ئاوارە و پەنابەران ئەمڕۆ پێنجشەممە 4ی شوبات بڵاویكردەوە، گەنجێکی کورد بەناوی (ئەمین شۆڕش) (تەمەن 21 ساڵ )لە شەوێکی درەنگدا ماڵەکەی جێدەهێڵێت، پاش چەند کاتژمێرێک لە دەرچوونی، هەواڵی مەرگی لەلایەن پۆلیسی دانیمارکەوە بڵاودەکرێتەوە و پاش لێکۆڵینەوەکانیش دەرکەوت کوژراوە.
دەشڵێت، پاش دەستگیركردنی چەند کەسێک بەهۆی لێدوانی ئەو کەسانەوە بکوژی ڕاستەقینەی ڕوداوەکە دەستنیشانکرا و وێنە و زانیارییەکانی لە دانیمارک و تۆڕە کۆمەڵایەتییەکاندا بڵاوکرایەوە كە گەنجێکی بەڕەگەز عەرەبە و ناوی (عەلی کازم)ە و خەڵکی شاری حلەیە و تەمەنی 19 ساڵە.
دەزگای لوتکە ئاشكراشیكردووە، پاش چەند ڕۆژێک بکوژەکە خۆی ڕادەستی پۆلیسی دانیمارک کردووە و دانی بە تاوانەکەدا ناوە و، لە ئێستاشدا پۆلیس سەرقاڵی لێکۆڵینەوەی زیاترن سەبارەت بە هۆکاری تاوانەکە.
