ئاژانسی ناسا، ڕایگەیاند، دیاردەیەکی گەردوونیی دەگمەن ڕوودەدات.
ئاژانسی ناسا، ڕایگەیاند، لە کۆتایی مانگی ئایاردا ، ئاسمان دیاردەیەکی دەگمەن و سەرنجڕاکێشی گەردوونی بەخۆیەوە دەبینێت کە بە ‘مانگی شین’ ناسراوە، تێیدا مانگ بە تەواوی و بە شێوەیەکی پڕ لە ئاسماندا دەردەکەوێت.
شارەزایانی گەردوونناسی ڕوونیدەکەنەوە کە ناونانی ئەم دیاردەیە بە ‘مانگی شین’ واتای ئەوە نییە کە ڕەنگی مانگ دەگۆڕێت بۆ شین، بەڵکو ئەمە دەستەواژەیەکی فەلەکییە و کاتێک بەکاردێت کە لە ماوەی یەک مانگی زاینیدا دوو جار مانگی پڕ (مانگی چواردە) لە ئاسماندا دەربکەوێت بەوپێیەی سەرەتای ئەم مانگەش مانگ بە پڕی دەرکەوت، کە ئەمەش ڕووداوێکی تاڕادەیەک دەگمەنە و چەند ساڵ جارێک دووبارە دەبێتەوە.
ناسا ئاماژەی بەوەش کردووە، ئارەزوومەندانی گەردوون و دیمەنە سروشتییەکان دەتوانن لە کۆتایی ئەم مانگەدا بە چاوی خۆیان بە ڕوونی سەیری ئەم دیمەنە ناوازەیە بکەن، بەبێ ئەوەی پێویستیان بە بەکارهێنانی ئامێری تایبەت یان تەلسکۆب ببێت.
