شارەزایەکی کەشناسی، ڕایگەیاند، ئەمڕۆ لە چەند ناوچەیەک باران دەبارێت و بای بەهێز چالاکدەبێت.
پشتیوان پێنجوێنی، شارەزای کەشناسی، بە تۆڕی میدیایی ئێستای ڕاگەیاند، هەندێک کاتی پێش نیوەڕۆی ئەمڕۆ هەینی لە بەشێکی ناوچە شاخاوییەکان و ناوچەی جیا جیای سنووری سلێمانی، هەڵەبجە، گەرمیان، کەرکوک و هەولێر بۆ ماوەیەکی کاتیی ئاسمان دەگۆڕێت بۆ هەوری تەواو و باران دەبارێت.
دەشڵێت، بەگوێرەی پێشبینییەکان نمەباران دەبارێت لەگەڵ چالاکبوونی بای بەهێز و دروستبوونی تەپوتۆزی ناوخۆیی.
ئاماژەی بەوەشکرد، ئەگەر هەیە لە چەند ناوچەیەکی شاخاویی و ناوچەی جیاجیا تاوەبارانی مامناوەند ببارێت لەگەڵ ڕوودانی هەورەگرمە و هەورەبروسکە.
وتیشی، شەوی هەینی لەسەر شەممە بۆ بەرەبەیانی ڕۆژی شەممە ، شەپۆلێکی خۆڵبارین ڕوودەکاتە زۆربەی ناوچەکانی هەرێمی کوردستان و ڕێژەی خۆڵبارینەکە بە گشتی مامناوەند دەبێت.
