قوباد تاڵەبانی لەگەڵ کونسوڵی ئەڵمانیا و بەریتانیا کۆبووەوە و جەختی لەوە کردووە بەردەوامبوونی ئەم دۆخە چەقبەستووە زیانی بۆ پێگەی هەرێمی کوردستان دەبێت.
قوباد تاڵەبانی، جێگری سەرۆکوەزیرانی هەرێمی کوردستان بڵاویکردەوە، لە کۆبوونەوەکانم لەگەڵ بەڕێزان ئەلبرێشت فۆن ڤیتکە، کونسوڵی گشتیی ئەڵمانیا و ئەندرو بیزلی، کونسوڵی گشتیی بەریتانیا، باسمان لە دۆخی سیاسیی هەرێمی کوردستان و دواکەوتنی پێکهێنانی حکومەتی هەرێمی کوردستان کرد.
وتیشی، پێویستە دەرچەیەک بۆ کۆتاییهێنان بەم چەقبەستوویە بدۆزینەوە و دەرگا بە ڕووی قۆناغێکی نوێدا بکەینەوە، چونکە بەردەوامبوونی ئەم دۆخە زیانی زیاتر بە پێگەی هەرێمی کوردستان، ژیان و گوزەرانی هاوڵاتییان دەگەیەنێت.
ئاماژەی بەوەشکرد، سەبارەت بە پەیوەندییەکانیشمان لەگەڵ بەغداد، ئاماژەمان بەوەدا، دەستبەکاربوونی حکومەتی نوێی فیدراڵ، دەرفەتێکی باشە بۆ ئەوەی لە ڕێگەی گفتوگۆ و لێکتێگەیشتنەوە کێشەکانمان چارەسەر بکەین.
