سەرۆکایەتیی شارەوانیی سلێمانی ڕایدەگەیەنێت، 7000 نەمامی زەیتوون لە هەواری شار دەچێندرێن.
سەرۆکایەتیی شارەوانیی سلێمانی لە ڕاگەیەندراوێکدا بڵاویکردەوە، لە چوارچێوەی هەوڵە بەردەوامەکانیان بۆ پاراستنی ژینگە و بەرەنگاربوونەوەی تەنگژەی وشکەساڵی، بە هاوکاریی بەڕێوەبەرایەتیی پارکی هەواری شار، هەڵمەتێکی فراوانی نەمامچاندن ئەنجامدرا و حەوت هەزار نەمامی زەیتوون لە زۆنی شاخی پارکی گەشتیاریی هەواری شار چێندران.
ڕاشیگەیاند، هەڵبژاردنی داری زەیتوون وەک جۆرێکی گونجاو بۆ ئەم ناوچەیە، بڕیارێکی ژینگەپارێزانە و زانستی بوو؛ چونکە بە خۆڕاگریی و تەمەندرێژی ناسراوە و دەتوانێت لەگەڵ گۆڕانکارییەکانی کەشوهەوا و سروشتی ناوچەکە بگونجێت.
سەرۆکایەتیی شارەوانیی سلێمانی جەخت لەوەشدەکاتەوە، سەوزکردنی زیاتری شار، بەشێکی گرنگی خزمەتکردنە بە هاوڵاتییان؛ بۆیە لە ئامێزی سروشتی ئەم شارە دڵگیرەوە، پەیمانی ئەمەکداری و بەردەوامی بۆ هاوڵاتییانی خۆشەویستمان نوێدەکەینەوە کە بێوچان و دڵسۆزانە هەوڵەکانمان بۆ ئەنجامدانی پڕۆژەی ژینگەیی، پاراستنی سروشت و سیما و جوانیی شار بەردەوامدەبێت.
