حکومەتی هەرێمی کوردستان دەستیکردووە بە ئامادەکردنی لیستی مووچەی مانگی پێنجی فەرمانبەران و مووچەخۆران.
سەرچاوەیەک لە وەزارەتی دارایی هەرێمی کوردستان ڕایگەیاند، سیستمی پەیڕۆڵ کاراکراوە و لە دوێنێوە سەرجەم وەزارەتەکانی حکومەتی هەرێمی کوردستان ئاگادارکراونەتەوە خشتەی ناوی فەرمانبەرانی وەزارەتەکانیان لە سیستمی پەیڕۆڵ تۆماربکەن.
هاوکات داواشیکردووە، ئەو داهات و خەرجییانەی وەزارەتەکان لە مانگی چواردا هەیانبووە، ڕەوانەی وەزارەتی دارایی بکەن بەمەبەستی ئامادەکردنی تەرازووی پێداچوونەوە.
ئەو سەرچاوەیە ئاماژەی بەوەشدا، چاوەڕوان دەکرێت تاوەکو کۆتایی هەفتەی ئاییندە لیستی مووچە و تەرازووی پێداچوونەوە ئامادەبکرێن و پێش ناردنی بۆ بەغداد، وردبینی بۆ بکرێت.
