هاوسەرۆكی یەكێتی پشتیوانی هێزەكانی ناوخۆی بۆ بەرقەرارکردنی ئاسایش و ئارامی زیاتر و پاراستنی سەروماڵی ھاوڵاتیان دەربڕی و دەڵێت، “بەهیچ پاساوێک ڕێگەنادرێت پێشێلکاری یاسا بکرێت”.
بافڵ تاڵەبانی، ھاوسەرۆکی یەکێتیی نیشتمانیی کوردستان ئەمڕۆ چوارشەممە 3ی شوبات سەردانی وەزارەتی ناوخۆی ھەرێمی کوردستانی کرد و لەلایەن ڕێبەر ئەحمەد، وەزیری ناوخۆ و لیوا چەتۆ ساڵح، بریکاری وەزارەتی ناوخۆ پێشوازیلێکرا.
لە دیدارێکدا بافڵ تاڵەبانی دەستخۆشی لە وەزارەتی ناوخۆ کرد و سوپاس و پێزانینی گەیاندە ئەفسەر و کارمەندانی ھێزەکانی ناوخۆ لەبەرامبەر ماندوبوون و ڕاپەڕاندنی ئەرکەکانیان. ھەموو پشتیوانی و ھاوکارییەکی دەربڕی بۆ سەرخستنی ھەوڵەکانیان و بەرقەرارکردنی ئاسایش و ئارامی زیاتر و پاراستنی سەروماڵی ھاوڵاتیان، وەك ئەوەی لە ڕاگەیەنراوێكی دیدارەكەدا هاتووە.
هاوسەرۆكی یەكێتی جەختیشی لە سەروەری یاسا و دادگاکان کردەوە و وتی، “ھیچ کەسێک لەسەروو یاسا و بڕیارەکانی دادگاوە نییە و بەهیچ پاساوێک ڕێگەنادرێت پێشێلکاری یاسا بکرێت”.
ھەر لەمیانی سەردانەکەیدا بۆ وەزارەتی ناوخۆ، بافڵ تاڵەبانی سەردانی لیوا چەتۆ ساڵح، بریکاری وەزارەتی ناوخۆی کرد و ھیوای سەرکەوتنی بۆ خواست لە ئەرکە نوێکەیدا.
لە درێژەی دیدارەکەدا باس لە ڕێوشوێنەکانی سەروەری یاسا و جێبەجێکردنی بڕیارەکانی دادگا کرا و جەخت لە ھەماھەنگی و کاری ھاوبەشی سەرجەم ھێزەکانی ناوخۆ کرا لەپێناو پاراستنی سەروماڵی ھاوڵاتیان.
