نوێنەری مامۆستایانی گرێبەست، لەبارەی بە هەمیشەییکردنی مامۆستایانی گرێبەست زانیاری دەخاتەڕوو.
عەلی ڕەئوف، نوێنەری مامۆستایانی گرێبەست، بە تۆڕی میدیایی ئێستای ڕاگەیاند، کۆدەنگییەک لە ئەنجومەنی نوێنەرانی عێراق هەیە بۆ ئەوەی مووچەی مامۆستایانی گرێبەستی وەزارەتەکانی خوێندنی باڵا و پەروەردە هاوشێوەی مووچەخۆرانی هەرێمی کوردستان، بچێتە سەر بەغداد.
وتیشی، عێراق لە بودجەی ئەمساڵی خۆیدا ژمارەیەکی بەرچاوی فەرمانبەر و مامۆستای گرێبەست دەکات بە هەمیشەیی، هەوڵی ئێمەش بۆ ئەوەیە مامۆستایانی گرێبەستی هەرێمی کوردستان بێبەش نەبن و بکرێن بە هەمیشەیی، ئەگەر پێویست بکات سەردانی بەغداد دەکەین.
بەگوێرەی ئامارەکان، وەزارەتی پەروەردە 37 هەزار و 933 مامۆستای گرێبەستی هەیە و وەزارەتی خوێندنی باڵا چوار هەزار و 100 مامۆستای گرێبەستی هەیە.
