بەڕێوەبەرایەتیی پارکی هەواری شار ڕایدەگەیەنێت، لەئێستادا بەبۆنەی ئاهەنگی خوێندکارانەوە، ڕۆژانە 14 بۆ 16 تۆن خۆڵ و خاشاک کۆدەکرێتەوە.
بەڕێوەبەرایەتیی پارکی هەواری شار ڕایگەیاند، تیمەکانمان بە هاوبەشیی کۆمپانیای جێبەجێکار، ڕۆژانە لە کاتژمێر 06:00ـی بەیانییەوە دەستدەکەن بە پاککردنەوەی سەرجەم زۆنەکانی ناو پارکی هەواری شار تاوەکو کاتژمێر 02:00ـی پاشنیوەڕۆ، بەڵام لە ڕۆژانی پشوو (هەینی و شەممە)، کاتژمێر 07:00ـی بەیانی بۆ 12:00ـی شەو کاردەکەن.
ئاماژەی بەوەشکرد، لەئێستادا، بەبۆنەی ئاهەنگی دەرچوونی خوێندکارانەوە، کاتێکی تری کارکردنمان داناوە بۆ مەبەستی پاکڕاگرتنی پارکەکە، کە ئەویش لە 12:00ـی شەوەوە تاوەکو 03:00ـی بەرەبەیان، تیمێکی ترمان کاری پاککردنەوە ئەنجامدەدات ڕاستەوخۆ دوای تەواوبوونی ئاهەنگی خوێندکاران.
دەشڵێت، لە ڕۆژانی ئاساییدا، 3 بۆ 4 تۆن خۆڵ و خاشاک کۆدەکرێتەوە، لە ڕۆژانی پشوو دەگاتە 8 بۆ 10 تۆن، بەڵام لەئێستادا، بەبۆنەی ئاهەنگی خوێندکارانەوە دەگاتە 14 بۆ 16 تۆن خۆڵ و خاشاک.
بەڕێوەبەرایەتییەکە ڕاشیگەیاندووە، بەو هیوایەین هەموولایەک لە شوێنی خۆیەوە پاکوخاوێنیی پارکەکە بپارێزێت، لەپێناو هێشتنەوەی ئەو پارکە جوانە کە بۆ خزمەتی شاری سلێمانی و دەوروبەری دروستکراوە.
