شرۆڤەکارێکی سیاسی ڕایدەگەیەنێت، دوای ئەوەی مەسعود بارزانی، داوایکرد هەڵبژاردنی سەرۆککۆمار و پێکهێنانی حکومەت دوابخرێت، فراکسیۆنەکانی ئەنجومەنی نوێنەران گوێیان لە داواکە نەگرت.
ئەو شرۆڤەکارە بە تۆڕی میدیایی ئێستای ڕاگەیاند، دوێنێ وەفدی پارتی دیموکراتی کوردستان، بە سەرۆکایەتیی فازڵ میرانی گەیشتە بەغداد بۆ گفتوگۆکردن لەبارەی پۆستی سەرۆککۆمار.
وتیشی، فراکسیۆنەکانی ئەنجومەنی نوێنەرانی عێراق، گوێیان لە داواکەی مەسعود بارزانی، سەرۆکی پارتی دیموکراتی کوردستان بۆ دواخستنی پڕۆسەی هەڵبژاردنی سەرۆککۆمار، نەگرت؛ کە چەند ڕۆژێک لەمەوبەر داوای لە چوارچێوەی هەماهەنگی کرد، پڕۆسەی هەڵبژاردنی سەرۆککۆمار و پێکهێنانی حکومەت لەم دۆخەدا دوابخرێت.
ئاماژەی بەوەشکرد، دوای چەند کاتژمێرێک لە پەیامەکەی مەسعود بارزانی، زیاتر لە 225 پەرلەمانتار واژوویان کۆکردەوە بۆ دانیشتنی ئەنجومەنی نوێنەران و ڕۆژی 11ـی نیسان بۆ ئەو دەنگدانە دیاریکرا.
ئەو شرۆڤەکارە ئەوەشی وت، “وەفدەکەی پارتی دوو ڕۆژە لە بەغدادە و وێستگەیەکی کۆبوونەوەکانیان، نوری مالیکی بوو، بەڵام لە ڕاگەیەندراوی کۆبوونەوەکەدا، هیچ ئاماژیەک بۆ بەرەوپێشچوون لە گفتوگۆکانیان نییە”.
