شارەزایەکی بواری کەشناسی هۆشداریدەدات و دەڵێت، ئەمشەو بارانی بەلێزمە دەبارێت و ئەگەری دروستبوونی لافاو هەیە.
هەڤاڵ سدیق، شارەزای بواری کەشناسی ڕایگەیاند، لەئێستادا کاریگەریی هەردوو نزمە پاڵەپەستۆی دەریای سوور و دەریای ناوەڕاست لە سەرجەم ناوچەکانی هەرێمی کوردستان و عێراق بەدیارکەوتووه و بارانبارین لە بەشێکی زۆری ناوچەکانی ناوەڕاست و باشووری عێراق دەستیپێکردووە.
ئاماژە بەوەشدەکات، لە ئێوارەی ئەمڕۆوە، بارانبارین ناوچەکانی هەرێمی کوردستانیش دەگرێتەوە؛ لە سەرەتادا بە نمەباران دەستپێدەکات، لەدوای کاتژمێر 08:00 بەدواوە بۆ درەنگانی ئەمشەو، دەگۆڕێت بۆ بارانی بەلێزمە.
ئەو شارەزایەی کەشناسی هۆشدارییش دەدات و دەڵێت، ئەم شەپۆلە شەپۆلێکی زۆر بەهێزە، هەورەبروسکەی بەهێز، تەرزە، هەوری سوپەرسێڵ و تەرزەی لەگەڵدایە و لە بەشێکی ناوچەکان، ئەگەری دروستبوونی لافاو هەیە.
