بەڕێوەبەرایەتیی گشتیی کەشناسی و بومەلەرزەزانیی هەرێمی کوردستان رایگەیاند، لە ئێوارەی ئەمڕۆوە شەپۆلێکی نمەباران روویکردۆتە بەشێک لە ناوچەکانی ئیدارەی زاخۆ و تا ئێستاش کاریگەرییەکەی کە لە هەندێک ناوچە هەورەتریشقەی لەگەڵە، درێژبێتەوە بۆ سەر پارێزگای دهۆک و زۆربەی ناوچەکانی ئەو پارێزگایە.
ئاماژەی بەوەشدا، پێشبینی دەکرێت تا نیوەشەو باران بارین بە شێوەی نمەباران و بارانی مامناوەند سەرجەم ناوچە شاخاویییەکانی هەولێر و سەنتەری شار و دەشتی هەولێر بگرێتەوە لەگەڵ بارینی بەفر لە ناوچە شاخاوییەکانی باکوور و باکووری رۆژهەڵاتی هەرێمی کوردستان.
ئەوەشی خستەڕوو، پێشبینی دەکرێت بۆ دوای نیوەشەو تا کاتەکانی بەیانیی رۆژی هەینی کاریگەریی بارانبارین درێژبێتەوە بۆ ناوچەکانی دیکەی رۆژهەڵاتی هەولێر و کۆیە و ئیدارەی راپەڕین و کەرکوک و گەرمیان و پاشان بۆ ناوچەکانی سلێمانی و هەڵەبجە و ناوچەکانی دیکەی گەرمیان هاوکات بەفربارین لە ناوچە شاخاوییەکان بە شێوەی پچڕپچڕ دەبێت، و لە ئێوارەو شەودا بارانبارین رادەوستێت و بەفربارین تەنها لە ناوچەشاخاوییە بەرزەکان بەردەوامی دەبێت.
کەشناسیی هەرێمی کوردستان باسی لەوەشكرد، پلەی گەرما بۆ سبەی رۆژی هەینی 4 بۆ 7 پلە نزمدبنەوە و ئەگەری خۆڵبارین هەیە بەتایبەت لە باشووری شاری هەولێر و کەرکوک و گەرمیان.
