بانکی ناوەندی: ئێمە بەرپرس نین لە جیاوازیی نرخی دۆلار

عەلا فەهد، وتەبێژی بانکی ناوەندیی عێراق رایگەیاند، “هۆکاری جیاوازیی نرخی رەسمیی دۆلار و ئەو نرخەی کە خەڵک لە بازاڕەکان ئاڵوگۆڕی پێوەدەکەن، دەگەڕێتەوە بۆ ئەو رێکارە نوێیانەی کە بەهۆی سیستمی ئەسیکۆداوە بۆ پێناسی گومرگی جێبەجێدەکرێت، زۆربەی بازرگانان بۆ بەدەستهێنانی دۆلار پەنایان بۆ بازاڕە نافەرمییەکان بردووە بەئامانجی خۆدزینەوە لە پێناسی گومرگی.”

هاوکات ئاماژەی بەوەشدا، “بانکی ناوەندیی هەوڵیداوە هەموو بازرگانان رابکێشێتە ناو سیستمی ئەسیکۆدا بۆ ئەوەی پارەدانی دەرەکی لەڕێگەی بانکە نێودەوڵەتییەکانەوە ئەنجامبدەن.”

وتەبێژی بانکی ناوەندیی عێراق ئاماژەی بەوەشكرد، ئەوان بەرپرس نین لەو جیاوازییەی ئێستا لەنێوان نرخی رەسمیی بانکەکە (1320 دینار بۆ یەک دۆلار) و ئەو نرخەی هاوڵاتییان لە بازاڕەکانی ئاڵوگۆڕی دراو مامەڵەی پێوەدەکەن.”

ماوەیەکە نرخی دۆلار بەرامبەر بە دینار بەشێوەیەکی بەرچاو بەرزبووەتەوە، ئەمڕۆ چوارشەممە نرخی 100 دۆلار گەیشتە 153 هەزار دینار.