دەزگای گشتیی کاروباری مین رایدەگەیەنێت، مینێکی دژەکەسی و پاشماوەیەکی تەقەمەنیی جەنگی، کە بەهۆی بەفر و باران خزابوونە سەر رێگەی هاوڵاتییان و مەترسییان دروستکردبوو، چارەسەرکران.
دەزگای گشتیی کاروباری مین لە راگەیەندراوێکدا بڵاویکردەوە، ئەمڕۆ یەکشەممە، دوای ئەوەی لەلایەن هاوڵاتییان ئاگادارکردنەوەی بەدەرکەوتنی مینێکی دژەکەسی لە جۆری (V69) و پاشماوەیەکی تەقەمەنیی جەنگی، کە بەهۆی بەفر و باران خزابوونە سەر رێگەی هاوڵاتییان لە گوندی دەربەند، سەر بە قەزای چۆمان و مەترسییان دروستکردبوو، دەستبەجێ تیمی لەناوبردنی کەرەستەی تەقەمەنی (EOD) گەیشتە شوێنەکە و بە شێوازی گونجاو و سەلامەت، چارەسەرکران و گواسترانەوە.
ئاماژە بەوەشکراوە، لە سەرەتای وەرزی زستان، بەڕێوەبەرایەتیی گشتیی کاروباری مینی هەولێر، رێنوێنیی تایبەتی لەسەر خزانەخوارەوەی مینەکان بەهۆی شەپۆلی بەفر و باران بە هاوڵاتییان دابوو، بۆیە لە کاتی بینینی مین یان هەر پارچەیەکی تەقەمەنی، راستەوخۆ پەیوەندی بە هێڵی گەرمی دەزگای مین بکەن بە ژمارە 182.
