شارەزایەکی کەشناسی: جارێکی دیکە بەفر دەبارێت

شارەزایەکی بواری کەشناسی پێشبینیدەکات، لە رۆژی پێنجشەممەوە شەپۆلێکی دیکەی بەفربارین ناوچەکەمان بگرێتەوە.

ئاراس جەبار، شارەزای بواری کەشناسی رایگەیاند، ئەمشەو یەکێک دەبێت لە ساردترین شەوەکانی ئەم مانگە و پلەی گەرمی لە سەنتەری پارێزگای سلێمانی و هەڵەبجە، 4 تا 5 پلە بۆ ژێر سفر و سەنتەری پارێزگای هەولێر، دهۆک و کەرکوک 2 تا 3 پلە بۆ ژێر سفر نزمدەبێتەوە و لە ناوچە شاخاوییەکانیش، 10 تا 13 پلە بۆ ژێر سفر و لە زۆربەی ناوچە و رێگەکان، شەختە و بەستن روودەدات پێویستە ئاگاداربن.

ئاماژەی بەوەشکرد، سبەی چوارشەممە 21ـی 1ـی 2026، کەش جێگیردەبێت و ئاسمانی هەرێمی کوردستان ساماڵ دەبێت و بەرزترین پلەی گەرمی بەراورد بە ئەمڕۆ، 2 تا 3 پلە بەرزدەبێتەوە، بەڵام پلەی گەرمی لە شەودا جێگیردەبێت و بەستن و بەستەڵەک بەردەوامدەبێت، بۆ رۆژی پێنجشەممە 22ـی 1ـی 2026، ئاسمانی هەرێمی کوردستان بەزۆری دەگۆڕێت بۆ نیمچەهەور و لە کاتەکانی شەودا، پێشبینیدەکرێت شەپۆلێکی بەفربارین رووبکاتە ناوچەکە و سەرەتاش لە ناوچەکانی رۆژئاوای هەرێمی کوردستان و عێراقەوە دەستپێدەکات و لە بەرەبەیانی رۆژی هەینییەوە 23ـی 1ـی 2026، سەرجەم ناوچەکانی هەرێمی کوردستان دەگرێتەوە کە بەشێوەی بەفربارینی مامناوەند دەبێت و لەسەر سەرجەم ناوچەکانی سنووری پارێزگای دهۆک، هەولێر، سلێمانی، هەڵەبجە، کەرکوک، نەینەوا، ئیدارەی راپەڕین، سۆران، زاخۆ و باکووری ئیدارەی گەرمیان بەفر دەبارێت و تا ئێوارەی رۆژی هەینی، ئەم شەپۆلە لەسەر ناوچەکانمان بەردەوامیی دەبێت.

رێژەی پێشبینیکراوی بەفربارین لە ماوەی رۆژی هەینی 23ـی 1ـی 2026:

– پارێزگاکانی دهۆک، هەولێر، نەینەوا، ئیدارەی زاخۆ و سەرجەم ناوچەکانیان 6-15 سم.

– پارێزگاکانی سلێمانی و هەڵەبجە 10-20 سم و ناوچە شاخاوییەکان 20-30 سم.

– ئیدارەی راپەڕین و سۆران 15-20 سم.

– پارێزگای کەرکوک و ناوچەکانی باکووری گەرمیان 1-4 سم و ناوچەکانی باشوور و ناوەڕاستی گەرمیان بارانبارین دەبێت 1-3 ملیم.