وەزیری پێشمەرگە پێشوازی لە فەرماندەی گشتیی هێزە ئاسمانییەکانی ناوەندی ئەمریکا لە رۆژهەڵاتی ناوەڕاست کرد.
وەزارەتی پێشمەرگە بڵاویکردەوە، ئەمڕۆ 13ی کانونی یەکەمی 2026، لەمیانەی سەردانێکی بۆ هەرێمی کوردستان، شۆڕش ئیسماعیل، وەزیری پێشمەرگەی حکومەتی هەرێمی کوردستان، پێشوازی لە فەریق دێرێک فرانس، فەرماندەی گشتیی هێزە ئاسمانییەکانی ناوەندی ئەمریکا لە رۆژهەڵاتی ناوەڕاست (AFCENT)، و تیمی سەربازیی ئەمریکا لە هەرێمی کوردستان کرد.
ئەوەش خراوەتەڕوو، لە بەشێکی کۆبوونەوەکەدا، هەردوولا دەربارەی دۆخی ئەمنیی ناوچەکە، پاڵپشتی و پشتیوانییەکانی ئەمریکا بۆ هێزی پێشمەرگەی کوردستان، هەنگاوەکانی بەرەوپێشچوونی وەزارەتی پێشمەرگە لە پرۆسەی چاکسازیی سەربازی گفتوگۆیان کرد.
باسی لەوەشکردووە، وەزیری پێشمەرگە لەبارەی بەرەوپێشچوونی هێزی پێشمەرگە رایگەیاند، “هێزی پێشمەرگە توانای سەربازی رۆژ لە دوای رۆژ بەرەوپێش دەچێت، بۆ ئەم مەبەستەش پێویستی بە پاڵپشتی زیاتری ئەمریکایە، هەروەها هیوای خواست هەماهەنگی و پەیوەندییەکانی نێوانمان بەردەوام و فراوانتر بێت”.
ئاماژەی بەوەشکردووە، لە بەرامبەردا، فەریق دێرێک پەیامی پشتیوانی ئەمریکای بۆ هێزی پێشمەرگەی کوردستان دووپاتکردەوە، چاکسازی و بەرەوپێشچوونەکانی پێشمەرگەی بەرزنرخاند، و هیوای خواست هێزی پێشمەرگە بگاتە ئاستێکی پێشکەوتووی سەربازی لە ناوچەکەدا.
