بەڕێوەبەری ئاوی سلێمانی رایدەگەیەنێت، لە بەیانی زووەوە سەرقاڵی چاککردنەوەی بۆری ئاوی گەڕەکی چوارباخین و بە زووترین کات کارەکان تەواودەکەین.
بەختیار تاهیر، بەڕێوەبەری ئاوی سلێمانی بە تۆڕی میدیایی ئێستای راگەیاند، ئەو بۆرییەی کە دەیگۆڕین، لە ساڵانی هەشتاکانەوە لەوێدایە، هۆکاری گۆڕینیشی ئەوەیە کە بۆرییەکە شکابوو و لە شەقامەکەوە ئاو دەهاتە دەرەوە، هەروەها دانیشتووانی گەڕەکی چوارباخ دووچاری کەمئاوی ببوونەوە، دواتر تیمەکانمان بە هەردوو ئاڕاستەکەدا بۆرییەکەیان بڕیوە تاوەکو بە یەکجاری کێشەکە چارەسەربکرێت.
سەبارەت بە وادەی کۆتاییهاتنی کارەکان، بەڕێوەبەری ئاوی سلێمانی ئاشکرایکرد، لە کاتژمێر حەوتی سەرلەبەیانییەوە تیمەکانمان سەرقاڵی چاککردنەوەی بۆرییەکەن و تاوەکو دەرەنگانی شەو کارەکانی چاککردنەوەی بۆرییەکە کۆتاییاندێت.
