تەندروستیی راپەڕین، رایگەیاند، سەرکەوتووانە مامەڵەمان لەگەڵ حاڵەتێکی کتوپڕی مەترسیداردا کرد.
بەڕێوەبەرایەتیی گشتیی تەندروستیی راپەڕین، بڵاویکردەوە، شەوی رابردوو تیمە پسپۆڕەکانی بەشی نەشتەرگەریی ئێسک و شکاویی و بێهۆشکاریی لە نەخۆشخانەی فریاکەوتنی رانیە، سەرکەوتووانە مامەڵەیان لەگەڵ حاڵەتێکی کتوپڕی مەترسیداردا کرد.
دەشڵێت، نەخۆشەکە گەنجێک بوو کە بەهۆی بڕینی چـ.ـەقۆوە لە بەشی ناوەڕاستی قۆڵی چەپیدا، دووچاری بڕانی قووڵی ماسولکەکان و خوێنبەرە سەرەکییەکان ببوو، کە بووبووە هۆی خوێنبەربوونێکی یەکجار زۆر و مەترسی لەسەر ژیانی دروستکردبوو.
ئەوەش دەڵێت، بە مەبەستی رزگارکردنی ژیانی نەخۆشەکە، دەستبەجێ رێکارەکان گیرانە بەر و نەخۆشەکە گوازرایەوە بۆ ژووری نەشتەرگەری، دوای بەکارهێنانی تۆرنیکێت (Tourniquet) و کۆنتڕۆڵکردنی خوێنبەربوون، لەلایەن تیمی نەشتەرگەرییەوە گەڕان و پشکنین بۆ شوێنی برینەکە کرا؛ خوێنبەرە زیانپێکەوتووەکان بە وردی بەسترانەوە و ماسولکە و پێستی نەخۆشەکەش چاککرانەوە.
ئەم نەشتەرگەرییە خاڵێکی وەرچەرخان بوو لە مێژووی نەخۆشخانەکەماندا، چونکە بۆ یەکەمجار تەکنیکی بێهۆشکاریی ناوچەیی (Regional Anesthesia) لەڕێگەی سۆنارەوە (Ultrasound-guided Brachial Plexus Anesthesia) بەکارهات. پێشتر لەم نەخۆشخانەیەدا تەنیا بێهۆشکاریی گشتی، بەنجی نیوەیی و لۆکاڵی بەردەست بوو، بەڵام ئەمڕۆ توانیمان ئەم خزمەتگوزارییە پێشکەوتووە بۆ یەکەمجار ئەنجامبدەین.
