پارێزگاری بانکی ناوەندیی عێراق رایدەگەیەنێت، سنووردارێتی لە ئابوری و لاوازی لە بەرهەمهێناندا، بووەنەتە هۆی ئەوەی عێراق ببێتە وڵاتێکی هاوردەکار و گوشار لەسەر نرخی دۆلار دروستببێت.
عەلی عەلاق، پارێزگاری بانکی ناوەندی لەمیانی کۆنفرانسێکدا لە قاهیرەی پایتەختی میسر، رایگەیاند، ژینگەی ئابوریی عێراق رووبەڕووی گوشارێکی ئاڵۆزبووەتەوە، عێراق لەبەردەم ئاڵنگارییەکی سەختی گەشە و بونیادی لاوازی ئابوریدایە، ئەمەش داهاتی هاوڵاتییانی سنووردارکردووە.
دەشڵێت، %90ی ئابوریی عیراق پشتبەستووە بە داهاتی نەوت، نەوتیش لە ئێستادا زۆر جێگەی متمانە نییە، ئەو وڵاتانەی پشت بە نەوت دەبەستن ئابورییەکی لاواز و لەرزۆکیان هەیە و دەبێت چارەسەری ریشەیی بۆ ئەم قەیرانە ئابورییە بدۆزنەوە.
ئەوەشی خستووەتەڕوو، سنوودارێتی لە هەمەچەشنیی ئابوریی عێراق و لاوازی سێکتەرەکانی بەرهەمهێنان، عێراقیان کردووەتە وڵاتێکی هاوردەکار، ئەمەش گوشارێکی گەورە و بەردەوامی بۆ سەر نرخی دۆلار و دراوەکانی دیکە دروستکردووە.
