ستیڤ ویتکۆف، نێردەی تایبەتی سەرۆکی ئەمریکا بۆ کاروباری ئاشتی، چاوی ڤۆڵۆدیمێر زلێنسکی دەکەوێت.
کەناڵی BBCی بەریتانی بڵاویکردەوە، بڕیارە کۆتایی ئەم هەفتەیە، وەک گوشارێک بۆ کۆتاییهێنان بە جەنگی نێوان روسیا و ئۆکرانیا، ستیڤ ویتکۆف لە بەرلین چاوی بە ڤۆڵۆدیمێر زلێنسکی، سەرۆکی ئۆکرانیا و و کۆمەڵێک سەرکردەی دیکەی وڵاتانی ئەوروپا بکەوێت.
ئاماژەی بەوەشکرد، پاش ئەوەی مانگی رابردوو ترەمپ پلانێکی 28 خاڵی بۆ کۆتاییهێنان بە جەنگی روسیا-ئۆکرانیا ئاشکراکرد، ئێستا دەستیکردووە بە گوشارخستنە سەر کیێڤ بۆ گەیشتنە رێکەوتنێک لەگەڵ مۆسکۆ.
ئەوەشی خستەڕوو، پلانەکەی ترەمپ پەیوەندییە سیاسییەکانی نێوان ئەمریکا و هاوپەیمانە ئەوروپییەکانی ئۆکرانیای ئاڵۆزکردووە، چونکە لە پلانەکەی ترەمپدا ئۆکرانیا ناچارکراوە دەستبەرداری بەشێک لە خاکەکەی ببێت بۆ مۆسکۆ.
لای خۆیشیەوە، زلێنسکی ئاشکرایکرد، بە پلانەکەی ترەمپدا چوونەتەوە و نەخشەرێگەیەکی نوێیان بۆ ئەمریکا ناردووە.
