شارەزایەکی بواری کەشناسی رایدەگەیەنێت، ئەگەرێکی بەهێز هەیە لە چەند ناوچەیەکی جیاجیا، لافاو رووبداتەوە.
پشتیوان پێنجوێنی، شارەزای بواری کەشناسی رایگەیاند، لە هەرێمی کوردستان، لە ماوەی نیوەڕۆی رۆژی هەینییەوە بۆ ئێوارەی رۆژی شەممە، شێ لە دەریای ناوەڕاست و دەریای سوور بەرەو ناوچەکانمان دێت، بە گشتی ئاسمان زیاتر هەوراوی دەبێت، هەوری مامناوەند بۆ هەوری نزمی تەماویی باراناوی، ناوبەناو باران دەبارێت و بە گشتی بارانبارینەکە مامناوەند دەبێت.
ئاماژەی بەوەشکرد، لە بەشێکی ناوچەکان ئەگەر بەهێزە هەندێک کات تاوەبارانی بەخوڕ ببارێت، لە ناوچەی جیاجیاش مەترسیی روودانی لافاو هەیە، لە ناوچە شاخاوییە بەرزەکان بەفر دەبارێت.
ئەوەشی خستەڕوو، لە رۆژی 20ـی 12ـوە تاوەکو 25ـی 12، شەپۆلی نوێی بارانبارین روودەکاتە ناوچەکانمان.
