باڵیۆزخانەی عێراق لە تورکیا رایگەیاند، سیستمی ڤیزەی ئەلیکترۆنی بۆ هاوڵاتییانی تورکیا دەستیپێکرد و دەڵێت، سەرەتا بۆ وەبەرهێنەران و بازرگانان جێبەجێدەکرێت.
باڵیۆزی عێراق لە ئەنقەرە، لە میانی مەراسیمێکدا کە باڵیۆزخانە بۆ ناساندنی سیستمی نوێی ڤیزە رێکیخستبوو، رایگەیاند، بە رەسمی دەستکرا بە پەیڕەوکردنی سیستمی نوێی ڤیزەی ئەلیکترۆنی لەگەڵ تورکیا.
روونیشیکردەوە، ئەم سیستمە دەرئەنجامی هاوکاریی هاوبەشی نێوان وەزارەتەکانی دەرەوە و ناوخۆی عێراقە.
لای خۆیەوە، نەشئەت خەفاجی، بەڕێوەبەری گشتیی باری شارستانی و پاسپۆرت لە عێراق رایگەیاند، رێکارەکانی پێدانی ڤیزەی ئەلیکترۆنی لەم هەفتەیەدا لە ئەنقەرە دەستیپێکردووە و هەفتەی داهاتووش، لە ئیستانبوڵ دەستپێدەکات.
