سەرۆکی بنکەی روناکبیریی گەلاوێژ، رایگەیاند، گەلاوێژ سیمبولی ناسنامەی کوردە.
د. ئیبتیسام ئیسماعیل، سەرۆکی بنکەی روناکبیریی گەلاوێژ، بە تۆڕی میدیایی ئێستای راگەیاند، سەرقاڵی ئامادەکارییەکانین بۆ 28ەمین فێستیڤاڵی نێودەوڵەتیی گەلاوێژ و میوانەکان لە هەرچوارپارچەی کوردستان و وڵاتانی دەرەوە بەشداردەبن.
وتیشی، فێستیڤاڵی گەلاوێژ بەردەوام لە نوێگەریدایە و پێشانگەی شێوەکارییش ئەمساڵ نێودەوڵەتی دەبێت لەناو فێستیڤاڵەکەدا.
ئاماژەی بەوەشکرد، “ئامانجی فێستیڤاڵەکە هەمیشە دروستکردنی پردی پەیوەندییە لەنێوان نووسەر، هونەرمەند و ئەدیبانی ناوخۆ بە دەرەوە و هەروەها ناساندنی کەلتووری کوردی بە جیهانی دەرەوە، گەلاوێژ سیمبولی ناسنامەی کوردە و کەلتوور، هونەر و فەرهەنگی کورد دەپارێزێت”.
د. ئیبتیسام ئیسماعیل، ئەوەشی وت، جگە لە پێشانگەی شێوەکاری، پێشانگەی کتێب و کاری دەستییش هەیە لە فێستیڤاڵی گەلاوێژ لەگەڵ ئاهەنگێکی گۆرانی بە بەشداریی دوو هونەرمەندی گەورەی کورد ناسری رەزازی و ئەیوب عەلی.
28ەمین فێستیڤاڵی نێودەوڵەتیی گەلاوێژ رۆژانی 20، 21، 22ی تشرینی دووەمی 2025، لە هۆڵی تەلاری هونەر لە سلێمانی بەڕێوەدەچێت.
