ئەمینداری گشتی نەتەوە یەکگرتووەکان رایگەیاند، پێشوازی لە بەڕێوەچوونی هەڵبژاردنەکان لە عێراق بە رێگەیەکی هێمن و رێکخراو دەکەن و پابەندن بە هاوکاریکردنی وڵاتەکە لە بەدیهێنانی خواستی هاوڵاتییانی.
ئەنتۆنیۆ گۆتێرێش ئەمینداری گشتی نەتەوە یەکگرتووەکان لە پەیامێکدا رایگەیاند، بەبۆنەی بەڕێوەچوونی هەڵبژاردنەکان پیرۆزبایی لە گەلی عێراق دەکەین، دەستخۆشی لە کۆمسیۆنی باڵای هەڵبژاردنەکان دەکەین بۆ هەوڵەکانی لە ئامادەکاریی و بەڕێوەبردنی پرۆسەکە بە شێوەیەکی کاریگەرانە.
هەر لە پەیامەکەدا هاتووە، “گرنگە حکومەتی عێراق لە کاتێکی گونجاودا کە رەنگدانەوەی خواستی عێراقییەکان بێت پێکبهێنرێت”.
جەختیشیکردەوە، “نەتەوە یەکگرتووەکان پابەندە بە پاڵپشتیکردنی عێراق لە چەسپاندنی دیموکراتی و بەدیهێنانی خواستی هاوڵاتییانی لە ئایندەیەکی ئارام و خۆشگوزەران”.
