ئەفسەرێکی بەڕێوبەرایەتیی فریاکەوتنی پۆلیسی پارێزگای بەسرە، بە ملیارێک دینارەوە دیار نەماوە کە موچەی دەیان پۆلیس بووە و پێی نەداون.
بەپێی هەواڵێکی کەناڵی دیجلە، ئەفسەرەکە سەرقاڵی پۆلیسەکانی قۆستووەتەوە کە موچەکانیان هەڵبگرێت و پێیان نەدات.
بەپێی هەواڵی سەرچاوەکە پۆلیسەکان سەرقاڵی پاراستنی ئەمنییەتی یاری نێوان عێراق و کوەیت بوون لە شاری بەسرە کە ڕۆژی 27ی کانوونی دووەم، بەڕێوەچوو.
دوای تەواوبوونی ئەرکەکەیان پۆلیسەکان گەڕاونەتەوە بنکەکەیان، بەڵام ئەفسەرەکە لەوێ نەبووە و بە موچەکانیانەوە دیار نەماوە.
پۆلیسی بەسرە دەڵێت، “ئەفسەرەکە بە پارەکانەوە لە عێراق چووەتە دەرەوە و نازانرێت بۆ چ وڵاتێک ڕۆشتووە، بەڵام ڕێکارە یاساییەکان دژی گیراوەتە بەر”.
ساڵانە ڕوداوی هاوشێوە لە عێراق ڕودەدات و ئەمساڵ عێراق لە پلەی شەشەمی گەندەڵترین وڵاتانی عەرەبیدایە، هەروەها لە پلەی 160ەمین وڵاتی شەفافدایە لە کۆی 180 وڵاتی جیهان کە ڕیزبەندییان بۆ کراوە.
