تەندروستیی سلێمانی: لە مانگێکدا زیاتر لە هەشت هەزار چارەخواز لە نەخۆشخانەی شەهید ئاسۆ بینراون

تەندروستیی سلێمانی ئاشکرایدەکات، لەمانگێكدا زیاتر لە هەشت هەزار چارەخواز لەنەخۆشخانەی شەهید ئاسۆ بۆ نەخۆشییەکانی چاو بینراون.

بەڕێوەبەرایەتیی تەندروستیی سلێمانی ئاماری چارەسەر و بینینی چارەخوازانی لە نەخۆشخانەی شەهید ئاسۆ بڵاوکردەوە، بەپێی ئامارەکە لەماوەی مانگی رابردوو لە رێكەوتی یەکی ئەیلوول بۆ 30ی ئەیلوولی 2025، لە نەخۆشخانەی شەهید دكتۆر ئاسۆ بۆ نەخۆشیەكانی چاو، هەشت هەزار و 285 چارەخواز لە دەوامی بەیانی و راوێژكاری نەخۆشخانەكە بینراون و چارەسەری پێویستیان بۆ كراوە.

ئەوەشی خستەڕوو، لەمانگی رابردوودا لەنەخۆشخانەی شەهید ئاسۆ 440 نەشتەرگەریی گەورە و 219 نەشتەرگەریی بچووک ئەنجامدراوە، هەروەها سێ هەزار و 596 پكشنینی پەستانی چاو، 43 پشكنینی پانتایی بینین، 241 پشكنینی گلێنە، 73 یاک لەیزەر و 80 ئارگۆن ئەنجامدراوە.

ئاماژەی بەوەشکرد، مانگی رابردوو لەنەخۆشخانەی شەهید ئاسۆ دوو هەزار و 223 پشكنینی چاویلكە، 629 سۆنەری چاو ئەنجامدراوە و 141 تیشك گیراوە، هاوكات هەزار و 146 پشكنینی تاقیگەیی ئەنجامدراوە.