بەڕێوەبەری گشتیی حەج و عومرەی هەرێم رایدەگەیەنێت، دوێنێ لە کەناڵێک، هەندێك قسە دەربارەی من بڵاوکراونەتەوە، کە بەداخەوە زۆربەی قسەکان دوورن لە راستی و کاری پیشەیی و میدیایی.
نیاز نەقشبەندی، بەڕێوەبەری گشتیی حەج و عومرەی هەرێمی کوردستان رایگەیاند، لە ماوەی چوار ساڵی کارکردنم لە بەڕێوەبەرایەتیی گشتیی حەج و عومرە، هیچ کەسێک فشاری نەکردووە کە کۆمپانیاکانی حەج و عومرە بە نایاسایی کار بکەن و ئێمەش رێگەمان بە کەس نەداوە دەستتێوەردان و کاری نایاسایی لەم بارەوەیە ئەنجامبدات.
لەبارەی بابەتی ئۆنڵاین بۆ ناونووسینی پاڵێوراوانی حەج، ئاماژەی بەوەکرد، “ئەم پڕۆژەیە بەشێکە لە پڕۆژەکانی حکومەتی هەرێم و فەرمانگەی تەکنەلۆجیا و زانیاری و وەزارەتمان، پێکەوە ئەنجاممانداوە و هیچ کەسێکیش دژایەتیی نەکردووە”.
نیاز نەقشبەندی لەبارەی دەستبەرداربوونی لە پۆستی بەڕێوەبەری گشتیی حەج و عومرە، دەڵێت، “ماوەی دوو ساڵ زیاترە ئەم داوایەم لە وەزیری ئەوقاف و کاروباری ئایینی کردووە، مەبەستیش ئەوە بوو کە بەندە خەریکی دروستکردنی مزگەوت، حوجرە و خانەقایەکم لە شاری هەولێر و هەنگاوی باشی بڕیوە، مەبەست لەم کارە خۆم بۆ خزمەتی ئایینی و شەرعی تەرخانبکەم، بەڵام ئەو کات داواکەم رەتکرایەوە و دوای ئەوەی ئەمساڵ بە هاوکاریی سەرۆکی حکومەت و وەزارەتمان، پڕۆسەی حەج بەسەرکەوتوویی ئەنجامدرا و داواکاریم بۆ خانەنشینبوون رەزامەندیی لەسەر دراوە و بە سوپاسەوە، هەموو لایەك هاوکار و پشتیوانم بوون بۆ سەرکەوتنەکانمان”.
