وتەبێژی دەزگای ئاسایشی هەرێمی کوردستان رایگەیاند، هاوڵاتییەکی ئەمریکی لە شەوی رووداوەکەی لالەزار لە سلێمانی دەستگیرکراوە و، بەبێ ئاگاداری وڵاتەکەی مەشقی بە هێزە میلیشیاکان کردووە.
عەقید سەلام عەبدولخالق، وتەبێژی دەزگای ئاسایشی هەرێم لە لێدوانێکدا ئاشکرایکرد، هاوڵاتییەکی ئەمریکی بە ناوی برایان ویڵسن لە شەوی رووداوەکەی لالەزار لە سلێمانی دەستگیرکراوە، پاش لێکۆڵینەوە لەگەڵیدا دانیبەوەدا ناوە کە خۆی سەربەخۆ، بەبێ ئاگاداری و رەزامەندیی وڵاتەکەی کە ئەمریکایە، هاوکار بووە لە دروستکردن، مەشق و راهێنانی مەیدانی بە میلشیایەکی چەکداری نایاسایی بەناوی “هێزی دووپشک”.
وتیشی، ئەو هاوڵاتییە ئەمریکییە وەک کەسێکی بەکرێگیراو ئەرکی مەشق و راهێنانی سەربازی داوە بەو هێزە، بۆیە بە بڕیاری دادوەری لێکۆڵینەوەی ئاسایش دەستگیرکراوە، ئێستا لە دەزگای ئاسایشی هەرێمی کوردستان راگیراوە و یاسای بەسەردا جێبەجێدەکرێت.
