گەرمکردنەوەی برنج خووێکە لەلایەن زۆرێک لە خەڵکەوە ئەنجامدەدرێت، بەڵام شارەزایانی بواری خۆراک هۆشداریی دەدەن لەوەی گەرمکردنەوەی برنج مەترسیدارە و سەردەکێشێت بۆ ژەهراویبوون بە خۆراک.
دکتۆر جێنیفەر کوینلان، پزیشکی بواری خۆراک لە زانکۆی درێکسلی ئەمریکا رایگەیاند، برنجی ئامادەنەکراو بەکتریایەک لەخۆدەگرێت کە تۆوەکانی دەتوانێت لە دۆخی گەرمی و کاتی لێناندا، بمێنێتەوە و دەربازببێت.
باسی لەوەکردووە، کاتێک برنجی لێنراو لە پلەیەکی گەرمی ئاساییدا بەجێدەهێڵرێت، ئەم بەکتریایانە دەتوانن گەشە بکات و سپۆڕ دابنێن، سپۆڕەکانی ئەم بەکتریایە دەتوانێت ژەهرێک بەرهەمبهێنێت کە دژی گەرمییە، بۆیە برنجێک کە چوار کاتژمێر بەسەر لێنانیدا رۆیشتبێت، خواردنی مەترسیدارە.
دەشڵێت، زۆرێک بڕێکی زۆر برنج لێدەنێن و دەیخەنە ساردکەرەوەوە، بەڵام ئەم خووە ئەگەری ژەهراویبوونی خواردنەکە زیاتر دەکات، بۆیە نابێت رێگەبدرێت برنج ساردببێتەوە و دەبێت بە زوویی بخورێت.
