وتەبێژی وەزارەتی ئەوقاف رایگەیاند، چوار هاوڵاتیی کورد لە کاتی چوونیان بۆ عومرە تووشی رووداوی هاتۆچۆ بوون، سیانیان گیانیان لەدەستدا و ئەوی دیکەیان بریندارە و دۆخی تەندروستیی ناجێگیرە.
نەبەز ئیسماعیل، وتەبێژی وەزارەتی ئەوقاف و کاروباری ئاینیی حکومەتی هەرێم بە تۆڕی میدیایی ئێستای راگەیاند، شەوی رابردوو چوار هاوڵاتیی خەڵکی پارێزگای هەولێر، لە رێگەی ئەنبار بەهۆی وەرگەڕانی ئۆتۆمبێلەکەیانەوە تووشی رووداوی هاتوچۆ بوون، سیانیان گیان لەدەستدا و ئەوی دیکەشیان بریندارە.
لەبارەی دۆخی تەندروستیی بریندارەکەوە، نەبەز ئیسماعیل ئەوەشی وت، لەئێستادا لە نەخۆشخانەیە و تەندروستیی ناجێگیرە.
وتیشی، ئەو چوار هاوڵاتییە لە رێگەی کۆمپانیاکانی سەر بە وەزارەتی ئەوقاف و دەستەی گشتیی حەج و عومرەوە گەشتەکەیان ئەنجامنەداوە، بەڵکو بەڵکو سەربەخۆ و بە ئۆتۆمبێلی خۆیان گەشتیان کردووە.
ئاماژەی بەوەشدا، هەرچوار کەسەکە هاوڕێی یەکترن، لە رەگەزی نێرن و پیشەیان ئاسنگەرییە.
