لە توێژینەوەیەکی نوێدا کە لە گۆڤاری (تایمز ئۆف ئیندیا) بڵاوکراوەتەوە، ناوی حەوت خۆراکی جیاواز و دەوڵەمەند بە پۆتاسیۆم هێنراوە، کە بۆ تەندروستیی دڵ بەسوودن.
لە توێژینەوەکەدا ئەوە خراوەتەڕوو، خواردنی ئەو خۆراکانەی دەوڵەمەندن بە پۆتاسیۆم، مەترسیی تووشبوون بە نەخۆشییەکانی دڵ تا رادەیەکی زۆر، کەمدەکەنەوە و لێدانی دڵ رێکدەکەنەوە.
ئەوەش هاتووە، پۆتاسیۆم کانزایەکی گرنگە کە یارمەتیی جەستە دەدات، ئاستی شلە هاوسەنگ بکات بە لابردنی سۆدیۆمی زیادە و رێکخستنی لێدانی دڵ و کۆنتڕۆڵکردنی پەستانی خوێن.
ئەو خواردنانەی کە لە توێژینەوەکەدا خراونەتەڕوو و دەوڵەمەندن بە پۆتاسیۆم، ئەمانەی خوارەوەن:
1- ئەڤۆگادۆ
فشاری خوێن کەمدەکاتەوە و یارمەتیی هەرسکردن دەدات؛ باشترین کاتیش بۆ خواردنی، ژەمی بەیانییان، یاخود پاشنیوەڕۆیە.
2- مۆز
لە هەر مۆزێکی قەبارە مامناوەند، نزیکەی 330 میلیگرام پۆتاسیۆم هەیە و بەسوودە بۆ تەندروستیی دڵ؛ باشترین کات بۆ خواردنی، پاش وەرزشکردن، یاخود لە ژەمی بەیانیاندا.
3- سپێناخ
لە هەر 80 گرامێکدا، بە نزیکەیی 545 میلیگرام پۆتاسیۆم هەیە و دەتوانرێت بە شێوەی زەڵاتە، یان لە شۆربادا بەکاربهێندرێت بۆ خواردن؛ باشترین کات بۆ خواردنی، لە ژەمی نیوەڕۆ یان ئێوارەدا.
4- پەتاتەی کوڵاو
پەتاتەیەکی مامناوەندی کوڵاو بە توێکڵەوە، نزیکەی 926 میلیگرام پۆتاسیۆمی تێدایە و زانایان پێشنیاردەکەن، لەجیاتیی ئەوەی بە شێوازی سوورکراوە بخورێت، بە کوڵاوی بخورێت بەهۆی ئەوەی دەوڵەمەندە بەو ماددە خۆراکییانەی کە یارمەتیی رێککردنەوەی پەستانی خوێن دەکەن؛ باشترین کات بۆ خواردنیشی، ژەمی ئێوارەیە.
5- ماسی
ماسی بڕێکی زۆر لە پۆتاسیۆم و ئۆمیگا 3ـی تێدایە کە یارمەتیی رێککردنەوەی لێدانی دڵ دەدات و لەگەڵیشیدا، دڵ دەپارێزێت لە نەخۆشی؛ باشترین کات بۆ خواردنی، ژەمی ئێوارانە.
6- نیسک
بەهۆی بەرزیی رێژەی پۆتاسیۆم و سوودەکانی بۆ رێککردنەوەی پەستانی خوێن، هەمیشە لە توێژینەوەکاندا ناوی نیسک دەهێندرێت؛ باشترین کات بۆ خواردنی، ژەمی نیوەڕۆ یان ئێوارەیە.
7- چەوەندەر
یارمەتیی زیادکردنی پۆتاسیۆم، ریشاڵ و ماددە خۆراکییەکانی کەمکردنەوەی هەوکردن، دەدات؛ باشترین کات بۆ خواردنی، ژەمی نیوەڕۆ یان ئێوارەیە.
