وتەبێژی یەکێتیی نیشتیمانیی کوردستان رایدەگەیەنێت، داوا لە دەسەڵاتی دادوەری دەکەین، بۆ رووداوەکانی لالەزار و هەوڵدان بۆ تیرۆرکردنی بافڵ جەلال تاڵەبانی، “یاسا سەروەربێت و تۆمەتبارانی ئەم کردە پیلانگێڕییە رووبەڕووی یاسا بکرێنەوە”.
کاروان گەزنەیی، وتەبێژی یەکێتیی نیشتیمانیی کوردستان لە کۆنفرانسێکی رۆژنامەوانیدا رایگەیاند، داوا لە حکومەتی هەرێمی کوردستان دەکەین بڕیارەکانی دادگا جێبەجێبکات و تۆماتباران بگەیەنرێن بە سزای یاسایی خۆیان و هەوڵبدرێت بە شەفافی و یاسایی ئەم دۆسیەیە ئاراستەی خۆی وەربگرێت.
وتیشی، وەک یەکێتیی نیشتیمانیی کوردستان رێگری لە هەر دەستتێوەردانێکی حیزبی و سیاسیی دەکەین لەم پرۆسەیەدا.
باسی لەوەشکرد، دڵگرانین بەوەی هەوڵێک هەبووە بۆ تێکدانی ئاسایش و ئارامیی شاری سلێمانی، راپەرین و گەرمیان و، لەنێویشیاندا هەوڵ و پیلانێک هەبووە بۆ تیرۆرکردنی بافل جەلال تاڵەبانی، سەرۆکی یەکێتیی نیشتمانیی کوردستان.
کاروان گەزنەیی جەختی لەوەشکردەوە، هێزە ئەمنییەکانی هەرێمی کوردستان رێگربوون لە هەوڵێکی پشێوی نانەوە و تۆمەتباران رادەستی یاسا کران.
