پۆلیسی سلێمانی دەستگیرکردنی چوار کەسی لە سەیدسادق راگەیاند، کە تۆمەتباربوون بە دزینی ماتۆڕسکیل و ئاژەڵ.
لە راگەیەندراوێکی بەڕێوەبەرایەتیی پۆلیسی سلێمانیدا هاتووە، “دوای ئەوەی هاوڵاتییەک لە نووسینگەی نەهێشتنی تاوانی سەیدسادق سکاڵای تۆمارکرد کە چەند سەر ئاژەڵێکی لێدزراوە، بڕیاری دادوەر بۆ دۆسیەکە وەرگیرا و هێزەكانی پۆلیس لێكۆڵینەوە و بەدواچوونەكانیان دەستپێكرد، سەرەنجام توانرا دوو تۆمەتبار بدۆزرێنەوە و دەستگیربکرێن”.
ئاماژەی بەوەشکرد، “لە چالاکییەکی دیکەدا و پاش تۆمارکردنی سکاڵای هاوڵاتییەک کە ماتۆڕسکیلی لێدزرابوو، بە بڕیاری دادوەر هێزەکانی پۆلیس لێکۆڵینەوە و بەدواداچونیان بۆ دۆزینەوەو دەستگیرکردنی تۆمەتباران دەستپێکرد، پاش گەیشتنە ئەنجامی لێکۆڵینەوەکان، توانرا لەلایەن مەفرەزەکانی نوسینگەی نەهێشتنی تاوانی سەیدسادقەوە دوو تۆمەتبار دەستگیربکرێن”.
ئاشکراشیکرد، “سەرجەم تۆمەتبارەکان دانیان بە تاوانەکانیاندا ناوە و بە بڕیاری دادوەر راگیراون”.
