سەرۆکایەتیی شارەوانیی سۆران بڵاویکردووەتەوە، هەڵمەتی دەستبەسەرداگرتنی ئاژەڵی ماڵیی سەر شەقامەکان دەستپێدەکات و دەست بەسەر ئەو ئاژەڵانەدا دەگیرێت، کە لەناو کۆڵان، گەڕەک و سەر شەقامەکان بەرەڵا دەکرێن.
لە راگەیەندراوێکی سەرۆکایەتیی شارەوانیی سۆراندا هاتووە، “ئەو ئاژەڵانە دەبنە هۆی لەناوبردنی دار و سەوزایی سەر شەقام و شۆستەکان و، هاوکات نیشاندانی سیمایەکی ناشارستانی. بۆ ئەم مەبەستەش بڕیاردراوە، لە سبەی دووشەممەوە رێکاری توندی یاسایی بەرامبەر خاوەن ئاژەڵەکان بگیرێتەبەر و، دەست بەسەر ئاژەڵەکانیان دەگیرێت، سزادەدرێن و چاوپۆشی لە کەس ناکرێت”.
جەختی لەوەشکردەوە، “هەر کەس و لایەنێک داوای هاوکاری بۆ ئەم بابەتە بکات، پێویستە خۆی ئامادەبێت پێبژاردن لە جیاتیی خاوەن ئاژەڵەکە بدات”.
