بەڕێوەبەرایەتیی گشتیی كارەبای سلێمانی رایدەگەیەنێت، لە چوارچێوەی پڕۆژەی رووناكی بۆ دابینكردنی كارەبای بەردەوام بۆ هاوڵاتییان، لە ئێوارەی ئەمڕۆوە زیاتر لە (100 ) گەڕەكی دیكەی ناوشاری سلێمانی كارەبایان دەبێت بە 24 كاتژمێری كە هەموو گەڕەكەكانیش دەكەونە دەرەوەی شەقامی بازنەیی مەلیك مەحمود.
لە راگەیەندراوەكەی بەڕێوەبەرایەتیی گشتیی كارەبای سلێمانیدا هاتووە، دوای تەواوبوونی ئامادەكارییە تەكنیكییەكان و بەپێی پلانی كاركردنی پڕۆژەی رووناكی ئێوارەی ئەمڕۆ پێنجشەممە بە ئامادەبوونی ئەندازیار ئەنوەر حمە بەڕێوەبەری گشتیی كارەبای سلێمانی و ئەندازیار ئومێد ئەحمەد بەڕێوەبەری كۆنترۆڵی كاروبای هەرێم و ئەندازیار غالب محەمەد بەڕێوەبەری كۆنترۆڵی كارەبای سلێمانی، دەستدەكرێت بە پێدانی كارەبای بەردەوام بە گەڕەكان كە زیاتر لە 117 هەزار هاوبەشی كارەبان و دەكەونە سەر 125 فیدەری كارەبا و بە گشتی لە پارێزگای سلێمانی هاوبەشانی پڕۆژەی رووناكی دەبن بە 257 هەزار هاوبەشی كارەبا.
