بە سەرپەرشتیی بافڵ جەلال تاڵەبانی، سەرۆكی یەكێتیی نیشتمانیی كوردستان رێوڕەسمی دەستبەكاربوونی سەركەوت زەكی وەك سەرپەرشتیاری نوێی مەڵبەندەكانی سلێمانی و چەمچەماڵ بەڕێوەچوو.
لە سەرەتای رێوڕەسمەكەدا، سەرۆك بافڵ ستایشی رۆڵ و ماندووبوونی زیاد جەباری كرد و وتی، “لە ماوەی كاركردنیدا خەمخۆرانە و یەكێتییانە ئەركەكانی راپەڕاندووە و جێگەی متمانەی هەموومان بووە، لە ئەرك و بەرپرسیارێتیی داهاتووشیدا وەك هەمیشە هاوكار و پشتیوانی دەبین”.
هەروەها بافڵ جەلال تاڵەبانی پیرۆزبایی لە سەركەوت زەكی كرد، هیوای خواست لەم ئەركە نوێیەیدا سەركەوتووبێت و جەختی لە گرنگیی پێگەی سلێمانی و چەمچەماڵ بۆ یەكێتیی نیشتمانیی كوردستان كردەوە و رایگەیاند، “پێگەی سلێمانی بۆ ئێمە ستراتیژییە، هەم بنچینەی رێكخراوەییمانە و هەم وزەی بەردەوامیی تێكۆشانی سیاسیی گەلە، بۆیە پابەندین بە خزمەتكردنی زیاتری شارەكە و كاركردن لەگەڵ خەڵكە تێكۆشەرەكەیدا بۆ مسۆگەركردنی داهاتوویەكی باشتر”.
سەرۆك بافڵ ئاماژەی بە خەباتی خەڵكی خۆشەویستی چەمچەماڵ لە ریزەكانی یەكێتیی نیشتمانیی كوردستان كرد و وتی، “ئێوە لانكەی كوردایەتین و ناوچەكانتان شایستەی ئاوەدانیی زیاترن، دڵنیابن لە جاران بە پەرۆشتر كار دەكەین تاوەكو زیاتر خزمەتتان بكەین”.
