پارێزگاری کەرکوک، لە سەردانێکیدا بۆ ناحیەی لەیلان، بڕیاری جێبەجێکردنی چەند پرۆژەیەک بۆ ناحیەکە دەدات.
بەپێی راگەیەندراوێکی پارێزگای کەرکوک، بەمەبەستی بەئاگابوون لە دۆخ و گوزەرانی هاوڵاتییان و گوێگرتن لە داخوازی و داواکارییەکانیان، ئەمڕۆ رێبوار تەها، پارێزگاری کەرکوک سەردانی ناحیەی لەیلان و گوندی ترکەشکانی کرد و بڕیاری جێبەجێکردنی چەند پرۆژەیەکی بۆ سنوورەکە دا.
لە راگەیەندراوەکەدا هاتووە، لە سەردانەکەدا کە ژمارەیەک لە ئەندامانی ئەنجومەنی پارێزگا و بەڕێوەبەری فەرمانگە خزمەتگوزارییەکانی کەرکوک یاوەری پارێزگار بوون، چەند کۆبوونەوەیەکی لەگەڵ دانیشتووانی سنوورەکە و بەڕێوەبەری فەرمانگەکانی ناحیەکە ئەنجامدا و، بڕیاریدا چەند پرۆژەیەک لە سنوورەکە جێبەجێبکرێن، لەوانە:
1- قیرتاوکردنی رێگای لەیلان – قادرکەرەم – مەفرەقی جەبارە بە درێژایی 12 کیلۆمەتر.
2- دروستکردن و قیرتاوکردنی رێگای نوێ بۆ گوندەکانی حەمک، حەفتەچەشمە، پوزل، بە درێژایی نۆ کیلۆمەتر.
3- کۆنکرێتکردنی رێگاوبانەکانی گوندی ترکەشکان.
4- دابینکردنی سەرچاوەی کارەبای پێویست و هەموو ئامێرە تەندروستییەکان و کەرەستە پێویستەکان بۆ بنکەی تەندروستیی لەیلان و کردنەوەی بەزووترین کات.
5- کردنەوەی پرۆژەی کۆنکرێتکردنی کۆڵانەکانی نێو لەیلان بەبڕی زیاتر لە 20 کیلۆمەتر.
