بەڕێوەبەری گشتیی پەروەردەی سلێمانی رایدەگەیەنێت، دانانی کامێرا و جی پی ئێس (دیاریکەری شوێن) لەناو پاسی خوێندکاراندا، بۆ کۆنترۆڵکردنی سەرپێچیی شۆفێرانە.
نەژاد عەبدوڵا، بەڕێوەبەری گشتیی پەروەردەی سلێمانی بە تۆڕی میدیایی ئێستای راگەیاند، لە ئەنجامی سەرپێچیی زۆری شۆفێرانی پاس و تاکسی و، بەهۆی ئەو هەموو رووداوە نەخوازراوانەی کە روویاندەدا، گەیشتینە ئەو بڕوایەی دەبێت میکانزمێکی گونجاو دابنرێت بۆ گەشتی بەهارە یان زانستیی خوێندکاران.
وتیشی، بیرمان لەوە کردووە دەبێت کامێرای چاودێری و جی پی ئێس بۆ پاس و تاکسیی خوێندکاران دابنرێت، بۆ ئەم مەبەستەش لەگەڵ قائیمقامی سلێمانی هەستاین بە دروستکردنی لیژنەیەک لەسەر ئەو بابەتە؛ چەند کۆمپانیاییەک پێشنیازیانکردووە و دەتوانن ئەوە بکەن.
ئاماژەی بەوەشکرد، بابەتەکە زۆر باشە، چونکە خواستی باوک و دایکانە و دانانی ئەو کامێرا و جی پی ئێسانەش، بۆ کۆنترۆڵکردنی سەرپێچی و تیژڕەویی شۆفێرانی پاس و تاکسییەکانە.
