بەڕێوەبەرایەتیی پۆلیسی دارستان و ژینگەی گەرمیان رایدەگەیەنێت، چەند چەکدارێک تەقەیان لە مەفرەزەیەکیان کردووە و لە ئەنجامدا پۆلیسێک، برینداربوو.
بەڕێوەبەرایەتیی پۆلیسی دارستان و ژینگەی گەرمیان لە راگەیەندراوێکدا بڵاویکردەوە، بەرەبەیانی ئەمڕۆ کاتژمێر 4:30، مەفرەزەیەکی بەشی پۆلیسی دارستان و ژینگەی خانەقین، بە سەرپەرشتیی نەقیب هاوڕێ جەلیل قادر، بەڕێوەبەری بەش لە سنووری گوندی سەنگەر بەمەبەستی نەهێشتنی دیاردەی راوکردن، دەرچوونێکیان ئەنجامدا.
دەشڵێت، چەند چەکدارێکی نەناسراو هەستاون بە تەقەکردن لە مەفرەزەکە و لە ئەنجامدا کارمەندێکیان بە ناوی باقی ئەبوبەکر، برینداربوو.
ئاماژەی بەوەشکرد، دواتر چەکدارەکان ئۆئۆمبیلەکەیان کە لە جۆری (نیسان پاترۆڵە) بەجێهێشتووە و هەڵاتوون، لەئێستادا دەست بەسەر ئۆتۆمبێلەکەدا گیراوە و رێکاری یاسایی گیراوەتەبەر.
