وەزارەتی کارەبای حکومەتی هەرێم رایدەگەیەنێت، کارەبای 24 کاتژمێری گەیشتووە بە زیاتر لە دوو ملیۆن هاوڵاتی، کە دەکاتە نزیکەی 30%ـی دانیشتووانی هەرێمی کوردستان.
وەزارەتەکە لە راگەیەندراوێکدا بڵاویکردەوە، زۆرینەی هاوڵاتییان لەسەر ئاستی شارەکانی هەولێر، دهۆک و سلێمانی دەستیان دەگات بە کارەبای 24 کاتژمێری و، فراوانبوونەکەش تەواوی هەردوو بازنەی 150 مەتری لە هەولێر و 60 مەتری لە سلێمانی دەگرێتەوە. بەمشێوەیەش، زیاتر لە دوو ملیۆن هاوڵاتی و 544 هەزار هاوبەش، ئێستا سوومەندن لە کارەبای 24 کاتژمێری.
ئاماژەی بەوەشکرد، زیاتر لە دوو هەزار و 100 مۆلیدەی گازوایل لە گەڕەکەکاندا کوژێنراونەتەوە و تا کۆتایی ساڵی 2026ـیش، حکومەتی هەرێمی کوردستان لە پلانیدایە زیاتر لە حەوت هەزار مۆلیدە بکوژێنێتەوە.
باسلەوەشدەکات، “لەژێر نرخە نوێیەکاندا، 80%ـی هاوڵاتییان پارەیەکی کەمتر دەدەن بە کارەبا بە بەراورد بەو پارەیەی دەیاندا بە هەردوو کارەبای نیشتمانی و کارەبای مۆلیدە گازوایلەکان”.
