ئەندامێکی ئەنجومەنی نوێنەرانی عێراق رایدەگەیەنێت، چارەسەر بۆ ئەم دۆخە، پابەندبوونە بە یاسای بودجە و بڕیاری دادگای فیدراڵی، نەک رێککەوتن.
دارا سێکانیانی، ئەندامی ئەنجومەنی نوێنەرانی عێراق رایگەیاند، بەهۆی ئاڵۆزبوونی گرفتەکان لەنێوان هەرێم و بەغداد، لەم ماوەیەی دواییدا زنجیرەیەک کۆبوونەوە لەنێوان هەردوولا ئەنجامدرا و بەغداد دەڵێت، دەبێت هەرێم پابەندبێت.
وتیشی، “پێموایە گرنگترین شت ئەوەیە ئەم پابەندبوونە، پابەندبوون بیت بە بڕیاری دادگای فیدراڵی و یاسای بودجە، نەک بە رێککەوتن لەگەڵ ئەنجومەنی وەزیران یان کارەتکەرێکی سیاسی لە عێراقدا، چونکە ئەگەر رێککەوتنێک لەسەر بنەمای یاسا و لە چوارچێوەی دەستووردا نەبێت، بواری تانەلێدانی هەیە”.
ئەوەشی وت، “ئەگەر بمانەوێت ئەم کێشەیە لە ریشەوە چارەسەربکرێت، تاکە چارەسەر پابەندبوونە بە بڕیاری دادگای فیدراڵی و یاسای بودجە”.
تاوەکو ئێستا فەرمانبەرانی هەرێم، مووچەی مانگەکانی پێنج و شەشیان وەرنەگرتووە؛ لەئێستادا وەفدێکی هەرێم لە بەغدادن و چاوەڕواندەکرێت، ئەمڕۆ و سبەی، بۆ ئەم پرسە یەکلاکەرەوە بێت.
